پاکستان انٹرنیشنل پریس ایجنسی

اسلام آباد (پی پی اے) ارسا نے سندھ اور پنجاب کو فراہم کیے جانیوالے پانی میں اضافہ کردیا

اسلام آباد (پی پی اے) انڈس ریورسسٹم اتھارٹی نے سندھ اور پنجاب کے پانی میں اضافہ کردیا۔ اسلام آباد میں پانی کے مسئلے پر ارسا کا اجلاس ہوا جس میں پانی کی دستیابی کا جائزہ لیا گیا۔ حکام نے بتایا کہ دریاؤں میں پانی کی آمد 24 فی صد بڑھ گئی ہے، 28 مئی کو پانی کی آمد ایک لاکھ 72 ہزار تھی جو 31 مئی کو بڑھ کر 2 لاکھ 25 ہزار ہوگئی۔ ملک میں پانی کی کمی 32 فی صد سے کم ہو کر 18 فی صد رہ گئی۔ اس صورت حال کو مدنظر رکھتے ہوئے ارسا نے صوبوں کے حصے میں اضافہ کر دیا۔ پنجاب کے حصے میں 18 ہزار کیوسک کا اضافہ کرتے ہوئے اس کے حصے کو 83 ہزار کیوسک سے بڑھا کر ایک لاکھ ایک ہزار کیوسک کر دیا گیا۔

اسی طرح سندھ کے حصے میں 35 ہزار کیوسک کا اضافہ کرتے ہوئے سندھ کا حصہ 74 ہزار کیوسک سے بڑھا کر ایک لاکھ 9 ہزار کیوسک کر دیا گیا۔ ارسا کے مطابق شمالی علاقہ جات میں درجہ حرارت بڑھ رہا ہے جس کی وجہ سے دریاؤں کے پانی کے بہاؤ میں مسلسل اضافہ ہو رہا ہے۔ چشمہ کے مقام پر ارسا کے اچھے انتظام کی وجہ سے گزشتہ دنوں ميں پانی کی کمی 8 ہزار کیوسک تک محدود رہی۔

Leave A Reply

Your email address will not be published.