پاکستان ورلڈ جونیئر ٹینس چیمپئن شپ اسلام آباد میں اختتام پذیر
اسلام آباد (پی پی اے) پاکستان ورلڈ جونیئر ٹینس چیمپئن شپ اسلام آباد میں اختتام پذیر. تھائی لینڈ اور قازقستان کے کھلاڑیوں نے سنگلز کے ٹائٹلز اپنے نام کیے، پی ٹی ایف ٹینس کمپلیکس میں چار دلچسپ فائنلز کے ساتھ بین الاقوامی جونیئر چیمپئن شپ اختتام پذیر. جے-30 صبحِ نو پاکستان ورلڈ جونیئر ٹینس چیمپئن شپ 2026، پی ٹی ایف ٹینس کمپلیکس، گارڈن ایونیو، اسلام آباد میں کامیابی کے ساتھ اختتام پذیر ہوگئی۔ چیمپئن شپ کے بوائز ڈبلز فائنل میں پاکستان کے عامر مزاری اور عمر جواد ملک نے شاندار کھیل کا مظاہرہ کرتے ہوئے ٹائٹل اپنے نام کرلیا۔ پاکستانی جوڑی نے فائنل میں جرمنی کے جیکب لیٹسچ اور سری لنکا کے جین ڈی سارم کو اسٹریٹ سیٹس میں 7-5، 7-5 سے شکست دے کر چیمپئن شپ جیت لی اور پاکستانی کھلاڑیوں کے لیے ایک اور اعزاز حاصل کیا۔بوائز سنگلز فائنل میں تھائی لینڈ کے فاسین سنچالونگ نے پاکستان کے احتشام ہمایوں کو 6-0، 6-3 سے شکست دے کر سنگلز کا ٹائٹل جیت لیا۔ گرلز سنگلز فائنل میں قازقستان کی ادیما السیپولوا نے اپنی ہم وطن کھلاڑی پولینا سوشکووا کو یکطرفہ مقابلے کے بعد 6-0، 6-0 سے شکست دے کر ٹائٹل اپنے نام کیا۔ ادیما السیپولوا نے چین کی یوکی لی کے ساتھ مل کر گرلز ڈبلز کا ٹائٹل بھی جیت لیا۔ اس جوڑی نے فائنل میں تھائی لینڈ کی پلویپچ ڈاونگکھیاؤ اور انیاوی پیسارنپانوونگ کو سخت مقابلے کے بعد 6-2، 1-6 (10-5) سے شکست دی۔چیمپئن شپ میں 16 ممالک کے مجموعی طور پر 55 کھلاڑیوں نے شرکت کی، جن میں 33 بوائز اور 22 گرلز شامل تھیں۔ شریک ممالک میں روس، ہانگ کانگ، چین، تھائی لینڈ، قازقستان، بنگلہ دیش، سنگاپور، سری لنکا، سربیا، آسٹریلیا، اسپین، کینیڈا، سویڈن، جرمنی، جاپان اور پاکستان شامل تھے۔تقریبِ تقسیمِ انعامات کے مہمانِ خصوصی وفاقی وزیر برائے پارلیمانی امور جناب طارق فضل چوہدری تھے، جبکہ صدر پاکستان ٹینس فیڈریشن (پی ٹی ایف) جناب اعصام الحق قریشی نے مہمانِ اعزاز کی حیثیت سے شرکت کی۔اس موقع پر صبحِ نو کی چیئرپرسن محترمہ شاہدہ کوثر فاروق اور پاکستان ٹینس فیڈریشن کے سیکریٹری جنرل کرنل ضیاء الدین طفیل بھی موجود تھے، جنہوں نے مہمانانِ خصوصی کے ہمراہ کامیاب کھلاڑیوں اور رنرز اپ میں انعامات تقسیم کیے۔تقریب میں اسلام آباد ٹینس ایسوسی ایشن کے چیئرمین جناب طارق محمود مرتضیٰ، پی ٹی ایف کے سینئر نائب صدر جناب سعید احمد خان، ڈائریکٹر پی ٹی ایف کرنل گل رحمان اور سیکریٹری اسلام آباد ٹینس ایسوسی ایشن جناب طفیل چیمہ نے بھی شرکت کی۔ اس کے علاوہ بڑی تعداد میں ٹینس کھلاڑیوں، میڈیا نمائندگان، کوچز، والدین اور ٹینس کے شائقین بھی موجود تھے۔پاکستان ٹینس فیڈریشن نے اس بین الاقوامی جونیئر چیمپئن شپ کے کامیاب انعقاد میں تعاون کرنے والے اپنے اسپانسرز صبحِ نو، پارک ویو سٹی، دیوان سیمنٹ، بینک الفلاح اور او جی ڈی سی ایل کی قابلِ قدر معاونت کو سراہا، جن کے تعاون سے اس بین الاقوامی ایونٹ کا کامیاب انعقاد ممکن ہوا۔
فائنل مقابلوں کے نتائج
بوائز سنگلز
فاسین سنچالونگ (تھائی لینڈ) نے احتشام ہمایوں (پاکستان) کو 6-0، 6-3 سے شکست دی۔
گرلز سنگلز
ادیما السیپولوا (قازقستان) نے پولینا سوشکووا (قازقستان) کو 6-0، 6-0 سے شکست دی۔
بوائز ڈبلز
عامر مزاری / عمر جواد ملک (پاکستان) نے جیکب لیٹسچ (جرمنی) / جین ڈی سارم (سری لنکا) کو 7-5، 7-5 سے شکست دی۔
گرلز ڈبلز
ادیما السیپولوا (قازقستان) / یوکی لی (چین) نے پلویپچ ڈاونگکھیاؤ / انیاوی پیسارنپانوونگ (تھائی لینڈ) کو 6-2، 1-6 (10-5) سے شکست دی۔
پاکستان جونیئر ٹینس کے لیے 2026 ایک شاندار اور کامیاب سال رہا، ملکی و بین الاقوامی سطح پر نمایاں کامیابیاں. یہ ٹورنامنٹ سال 2026 کے دوران پاکستان میں منعقد ہونے والے ورلڈ ٹینس جونیئر ٹور کے آخری ایونٹ کی حیثیت رکھتا ہے۔مجموعی طور پر 2026 پاکستان جونیئر ٹینس کے لیے ایک غیر معمولی اور کامیاب سال ثابت ہوا، جس میں پاکستانی کھلاڑیوں نے ملک اور بیرونِ ملک متعدد نمایاں کامیابیاں حاصل کیں، مختلف بین الاقوامی ٹورنامنٹس کے ٹائٹلز جیتے اور فائنلز و سیمی فائنلز تک رسائی حاصل کی۔سال 2026 کے دوران پاکستان نے ورلڈ ٹینس جونیئر ٹور کے 7 ٹورنامنٹس کی میزبانی کی، جبکہ پاکستانی کھلاڑیوں نے بیرونِ ملک 9 بین الاقوامی جونیئر ٹورنامنٹس میں حصہ لیا۔ اس طرح مجموعی طور پر 16 بین الاقوامی جونیئر ٹورنامنٹس میں شرکت اور میزبانی کی گئی۔ورلڈ ٹینس انٹرنیشنل جونیئر ٹینس رپورٹ – 2026
ٹورنامنٹس کا مجموعی خلاصہ – 2026
پاکستان میں منعقد ہونے والے ورلڈ ٹینس جونیئر ٹورنامنٹس: 7
بیرونِ ملک کھیلے گئے ورلڈ ٹینس جونیئر ٹورنامنٹس: 9
کل ٹورنامنٹس: 16
1۔ پاکستان – اپریل 2026
ٹورنامنٹس کے نتائج
لیگ 1 – اسلام آباد
سنگلز چیمپئن: میکائیل علی بیگ
سنگلز رنر اپ: ابوبکر طلحہ
ڈبلز چیمپئن: حمزہ رومان / ابوبکر طلحہ
لیگ 2 – اسلام آباد
سنگلز چیمپئن: میکائیل علی بیگ
ڈبلز چیمپئن: احتشام ہمایوں / میکائیل علی بیگ
لیگ 3 – اسلام آباد
سنگلز چیمپئن: ابوبکر طلحہ
ڈبلز چیمپئن: میکائیل علی بیگ / لیوک جی ژی ہو (سنگاپور)
2۔ پاکستان – اکتوبر تا نومبر 2026
ٹورنامنٹس کے نتائج
لیگ 1 – لاہور
سنگلز چیمپئن: ابوبکر طلحہ
ڈبلز چیمپئن: ابوبکر طلحہ / حمزہ رومان
لیگ 2 – اسلام آباد
ڈبلز چیمپئن: حسن عثمانی / حذیق عاصم
ڈبلز رنر اپ: حمزہ رومان / احتشام ہمایوں
لیگ 3 – اسلام آباد
ڈبلز چیمپئن: احتشام ہمایوں / حمزہ رومان
ڈبلز رنر اپ: عامر مزاری / الیگزینڈر ویارسوٹسکی
سنگلز سیمی فائنلسٹ: حمزہ رومان
لیگ 4 – اسلام آباد
سنگلز رنر اپ: احتشام ہمایوں
ڈبلز چیمپئن: عامر مزاری / عمر جواد ملک
3۔ آئی ٹی ایف جونیئر ٹورنامنٹس – نیروبی، کینیا
فروری 2026 – تین ٹورنامنٹس
پاکستان کے حمزہ رومان نے کینیا کے شہر نیروبی میں تین ہفتوں پر مشتمل آئی ٹی ایف جونیئر ٹورنامنٹ سیریز میں شاندار کارکردگی کا مظاہرہ کیا۔
پہلا ہفتہ: حمزہ رومان – سنگلز رنر اپ۔
دوسرا ہفتہ: حمزہ رومان – سنگلز اور ڈبلز سیمی فائنلسٹ، ڈبلز میں احتشام ہمایوں کے ساتھ شراکت داری کی۔
تیسرا ہفتہ: حمزہ رومان / ابوبکر طلحہ – آئی ٹی ایف جے 60 ڈبلز چیمپئنز۔
4۔ بین الاقوامی جونیئر ٹینس میں نمایاں کامیابیاں
گوئٹے مالا اور جمیکا
میکائیل علی بیگ نے گوئٹے مالا میں آئی ٹی ایف جے 60 سنگلز فائنل تک رسائی حاصل کی، جس کے بعد جمیکا میں آئی ٹی ایف جے 30 ٹورنامنٹ میں شاندار کارکردگی دکھاتے ہوئے سنگلز اور ڈبلز دونوں کے ٹائٹلز جیتے۔
دوشنبے، تاجکستان
عامر مزاری / حسن عثمانی – آئی ٹی ایف جونیئر ڈبلز فائنلسٹ۔
تیونس
احتشام ہمایوں:
جے 30 ڈبلز فائنلسٹ – لیگ 1۔
جے 30 ڈبلز چیمپئن – لیگ 2۔
میکی، جاپان
میکائیل علی بیگ – آئی ٹی ایف جے 100 ڈبلز چیمپئن۔